魔術率先闖次圈

縱然「魔獸」杜域侯活繼續受到犯規次數困擾,但「老飛人」卡特、尼爾遜及劉易斯演出穩定,協助魔術以99比90再勝山貓,在七場四勝的東岸首圈輕鬆直落四場橫掃呢支「季後賽初哥」,同時亦成為今季首支晉級次圈嘅球隊。魔術將面對鷹隊與公鹿嘅勝方,公鹿尋日再追一局,兩軍現時打成二比二。

基於山貓整體實力不及魔術,所以今個系列賽明顯帶有距離,再加上「Captain Jack」史堤芬積遜尋日大失水準,11次起手僅入2球,全場只得8分,連主要得分點都啞火,山貓想翻身都難。結果魔術全場控制戰局下,以99比90輕取對手,連勝四場出線。

「魔獸」犯規多隊友補飛

杜域侯活今場再受犯規次數困擾,整場賽事只係上陣23分鐘僅入6分,並在第四節六犯離場;幸好其餘隊友都交到貨,卡特攻入21分、尼爾遜18分,而劉易斯亦有17分進帳,均分擔了杜域侯活嘅得分責任,但「魔獸」必須要正視犯規問題,因為首圈季後賽中,杜域侯活每場至少五次犯規,更有三場賽事上陣時間不足三十分鐘,大大影響球隊部署。

公鹿擒鷹追成二比二

魔術出線後,將獲得較多休息時間,靜候鷹隊與公鹿決出勝負,尋日公鹿藉主場之利,憑真寧斯攻入23分、迪芬奴及沙蒙斯分別射入22分,協助球隊以111比104擊敗鷹隊,總成績追成2比2。真寧斯賽後話球隊贏在冇壓力在身,因為大部分人都睇死佢哋會首圈出局,球員反而可以放開懷抱比賽。

本報綜合報道