公牛排除萬難玩季後賽
NBA常規賽尋日煞科，公牛喺最後一戰憑戴歷羅斯攻入27分，以98比89輕取山貓，力壓速龍取得最後一張季後賽入場券。至於西岸名次之爭亦告一段落，小牛及太陽煞科日均贏波，兩軍將分別以二號及三號種子出戰西岸季後賽，其中太陽首圈抽得上上籤，因對手係有主力萊爾受傷嘅拓荒者。
公牛尋日喺生死戰表現穩定，作客夏洛特由頭帶到尾之下，以98比89擊敗山貓，以總成績41勝41負完成常規賽，力壓速龍搭上季後賽尾班車，首圈硬撼常規賽盟主騎士。控衞戴歷羅斯繼續成為贏波功臣，個人攻入27分及5次助攻，至於擺脫腳傷嘅諾亞，就貢獻「雙雙」21分及13個籃板球，佢賽後表示：「你知唔知點解我咁鍾意公牛？因為當球隊遇到阻礙，例如連輸十場時，大家都唔會放棄，隊友們都相信大家，我哋係值得獲取季後賽資格。」
西岸名次定 小牛撼馬刺
事實上，公牛今季經歷不少困境，例如主力受傷患困擾、球會為慳錢而放走沙蒙斯及特魯斯湯馬士等主將，而早前教練迪尼高及副會長柏臣亦發生衝突，但球隊最終都能排除萬難，奪得季後賽資格。
速龍方面，雖然同日亦大炒紐約人131比113，但因公牛贏波，令佢哋躋身季後賽嘅夢想幻滅。
至於為名次爭崩頭嘅西岸，馬刺在煞科日收起兩名大將真路比利及鄧肯，結果以89比96不敵小牛，小牛贏波後鎖定成為西岸二哥，首圈將會再對馬刺。同日太陽在關鍵之戰以100比86擊敗爵士，力壓爵士及金塊取得第三種子，首圈會遇上飽受傷兵困擾嘅拓荒者，形勢有利。
本報綜合報道