政情：肥仔明醫疣乘機美容

原來肥仔明多年來都被一種叫做「疣」嘅過濾性病毒困擾，四肢都生咗啲丘疹，聽講呢種病冇特定原因，好似感冒一樣，當一個人免疫力差嗰時就特別容易感染。

肥仔明最初不以為然，點知最近連塊臉都生疣，佢覺得有礙觀瞻，惟有向著名皮膚科醫生史泰祖求助。

史醫生原本只係用激光將肥仔明臉上嘅疣整走，不過見肥仔明臉上有唔少色斑，就問佢做唔做埋激光去斑，肥仔明見做開激光去疣咪順便做埋激光去斑囉。肥仔明上周六做完激光後，塊面嘅紅印到依家都未散，不過啲疣用激光清除後就唔會再復發，冇晒啲斑個人又後生咗，計落都值得嘅。