政情：任總過完冷河想出山
前金管局總裁任志剛舊年十月一日退休後，半年嘅冷河期三月底就結束，早前任總曾講明唔打算到私人機構打工，但原來唔佔太多時間嘅非執行或顧問工作佢都唔拘。雖然任總在任時年薪成千萬元，但香港人好長壽，九十幾歲人都未算老，所以任總退休後繼續搵番啲非全職工做，都好應該嘅！
任總喺佢最新嘅網誌《我的退休生活》文章中，同大家分享佢嘅近況。佢話學hea真係唔容易，但hea嘅感覺幾好，因為全無壓力咁生活，相對以往每分每秒都拉得繃緊嘅工作節奏，真係天淵之別。不過hea得太多個腦會生銹，所以佢喺「報國」同埋「講學」嘅工作之外，再搵嘢去填滿生活時間。其實好多人搵佢重出江湖，反而選擇同埋邀請太多令佢難以取捨添！
任總講嘅「報國」係出任中國金融學會執行副會長，至於「講學」係指喺中大全球經濟及金融研究所做金融學術研究同埋授課，任總話兩項工作已佔用佢工作嘅時間七七八八，睇嚟佢唔打算到私人機構做全職工作嘅決定係啱嘅。