已經喺大埔工業邨做緊亞洲電視「義工」嘅內地商人王征，經常發表金句。佢接受內地周刊訪問時話，佢提過要將亞視打造成亞洲嘅ＣＮＮ，但唔係針對唐人街咁簡單，而係針對華爾街。仲話想開嘅普通話台暫定為「歡樂亞洲台」。
官方「新華社」年初都推出咗國際衞星電視頻道，仲話要打造「中國ＣＮＮ」，咁亞視咪同新華社打對台？王征好識講，話一個係亞洲ＣＮＮ，一個係中國ＣＮＮ，已經唔同啦！佢唔會以新華社為對手嘅！
聲稱要入股亞視之前，王征嘅知名度唔高，但係依家佢個名響遍大江南北。佢話自己過去冇失敗過，預計五年之內可以扭轉亞視長年虧蝕嘅局面，有信心用廿年時間將亞視打造成功添！
亞視兩大股東蔡衍明同查懋聲打緊官司，法院禁制亞視於官司期間出售股份，令佢入股一事受阻，但王征好有耐性等，話可以做兩、三年義工喎！
