政情：高錕訪弘立 熊不離手
諾貝爾物理學獎得主「光纖之父」高錕留喺香港嘅日子，真係幾奔波勞碌，尋日佢返去由佢創辦嘅私立一條龍學校弘立書院出席慶祝典禮。校方除咗將學校中學部廣場正式命名為「高錕教授廣場」，又成立一個以高錕命名嘅「高錕創新發展獎」外，仲送咗隻身穿弘立書院校服嘅小熊毛公仔畀高錕。
命名中學部廣場
弘立書院校董會主席黃惠君喺慶典中，特別感激高錕對學校嘅無私貢獻、出色嘅領導、不斷嘅鼓舞和啟發。校方為表謝意，將學校中學部廣場正式命名為「高錕教授廣場」，依家喺嗰度擺放有關高錕喺光纖方面嘅研究和成就，以及有關技術如何推動全球嘅通訊發展。校方又成立一個以高錕命名嘅「高錕創新發展獎」。
校方仲向高錕送贈一隻身穿弘立書院校服嘅小熊毛公仔。高錕似乎對呢隻毛公仔情有獨鍾，一直毛公仔不離手，影合照時，佢仲特登舉起隻毛公仔，驚隻毛公仔被其他人遮住，上唔到鏡。