本文重點
政壇尋日好事成雙，民主黨元老司徒華及前行政局首席議員鄧蓮如（Lydia）勳爵不約而同趁元宵佳節擺壽酒，Lydia仲送咗個蛋糕為華叔賀壽，兩人喺上世紀八十年代相識，當年Lydia係立法局首席議員，曾當眾稱讚華叔政治了得，因為華叔令佢明白，政治上預計可以成功爭取嘅，就要大大聲話爭取，如果無把握就唔好咁大聲嘞。
華叔尋日喺旺角一間酒店慶祝七十九歲生日，一班民主黨黨友、教協同仁及數十位舊生來個「羅漢請觀音」，每人夾五百元為華叔賀壽。患上第四期肺癌嘅華叔接受完兩次化療後情況穩定，尋日致辭時中氣十足，仲一口氣吹熄蛋糕上嘅蠟燭。
自言比魯迅幸福
華叔致辭時感觸良多，話大半生奔波工作，既做咗四十年老師，又成立教協及創立民主黨前身嘅港同盟等，工作最大得着係認識眾多良朋知己，更引述名作家魯迅名句「人生得一知己足矣」，話自己比魯迅幸福千百倍，佢相信喺各方好友支持下會戰勝病魔，十年、二十年後會繼續同大家慶祝生日。
另一邊廂，Lydia尋日喺君悅筵開十二圍賀七十歲生日，久違了嘅佢風采依然，穿着鮮紅色背心晚裝裙，身上無一絲肥肉，面上不現皺紋，佢保持青春嘅奧秘好多人都知，就係每日做運動同跳舞。
Lydia嘅出生日期，係一九四○年二月廿九日，佢尋日與生肖同係屬龍嘅前政務司司長陳方安生及其孖生妹妹方寧生齊齊吹蠟燭，九十二歲嘅前行政會議召集人鍾士元獲「媽打」李麗娟等簇擁左右，賓主不知幾高興。Lydia話，老公唐明治任佢揀一份生日禮物，金額不設上限，佢一於落足心機慢慢揀。
卓妮