本文重點
煲呔曾跛腳鴨政府剩下兩年半任期，曾系高官唔想撈嘅心態愈嚟愈露骨！「鬍鬚曾」曾俊華發表完其任內第三份預算案，過去三日放軟手腳做人肉錄音機，任公眾點質點㩒，都係重複幾套標準答案，唔畀佢激死都悶瓜，而佢老細煲呔曾仲離譜，尋晚出席中聯辦新春酒會，主任彭清華台上致辭，佢竟然坐喺隔籬瞌眼瞓，慌死人唔知佢一早想收工，不如早啲返屋企啦！
中聯辦喺會展新翼大禮堂舉行新春酒會，高層空群而出，政商界人士更加人頭湧湧，到戲肉彭清華發言，台上個個挺直腰板，留心傾聽，但係身為台上唯一特區政府代表嘅煲呔曾，則一早左顧右盼，唔多留心。
鬍鬚曾變人肉錄音機
彭清華讀咗約十分鐘，致辭去到尾段，同睡魔打交嘅煲呔曾好明顯打輸咗，當彭清華讀到：「中央政府一再重申，無論香港遇到多大的困難……」煲呔曾已經墮入夢鄉，瞓咗七秒之後，佢郁郁嘟起嘅鱆魚嘴，忽然夢醒，佢望望兩邊，尷尬咁笑，隨即點頭，假扮留心彭主任發言。煲呔曾瞓着至醒番嘅過程，讀者可以上東方報業集團旗下嘅ontv新聞台睇全片。
無心戀戰至此，煲呔曾咁辛苦不如早日退下，去燒雞翼、餵錦鯉同瞓晏覺好過，否則成個政府都瀰漫住咁嘅心態，香港想搞得好都幾難。好似佢嘅同姓兄弟鬍鬚曾，身為財爺，對關乎民生福祉嘅預算案放軟手腳。公布預算案以後三日以來，預算案內所有重大政策，都係由一班局長代勞解畫，而鬍鬚曾無論記者會定上論壇，都係背標準答案，腦汁一滴都唔使用，唔怪得佢同煲呔曾係兩兄弟。
好似尋日咁，鬍鬚曾上電台烽煙節目，無論答乜嘢問題，一律重播錄音帶，將預算案公布當日記者會嘅台詞，幾乎全套照搬番晒出嚟，乜嘢「樓市未見明顯泡沫」、「政府密切留意」、「派糖只係小部分」，不停重播又重播，難得係三日來絕無跳線食帶，人肉錄音機性能一流，佢認咗第二，林瑞麟都唔敢認第一。