Pauline自從升任秘書長後，已經兼任立法會星期三大會秘書，照計唔使再參與其他委員會，但立法會調查議員涉嫌求愛不遂炒女助理，香港史無前例，委員會成立前又經歷一波三折，所以Pauline要親自「監工」，坐入委員會做秘書，於是不幸成為委員口中左右委員會調查進度嘅三個女人之一。

吳文華落場「監工」

有委員透露，Pauline名義上只係秘書，但實際上喺委員會角色好重，甚至可以話帶住成個會嚟行，關於調查程序或規例，好多建議其實都係Pauline嘅主意，好似委員會嘅調查程序以議員個人利益監察委員會為藍本，仲要參考專責委員會咁，都係佢嘅主意。此外，委員會之前提出一個相當特別嘅建議，聆訊容許喺立法會大樓以外地方進行，呢個建議明顯為事件女主角黃麗珠度身而造，一問之下，都係出自Pauline手筆。

一名委員尋日語帶感慨話，蘇菲梁出名長氣，梁美芬意見多多，再加上Pauline「監工」巨細無遺，喺程序規例上乜都要揸住放大鏡端詳一番，跟足程序，委員會嘅工作無法快速推進，有乜出奇啫？該名委員雖然無對Pauline口出怨言，但確實覺得委員會工作唔夠乾脆利落。其實Pauline凡事親力親為並非壞事，但未必人人欣賞，才會惹嚟微言。

講開呢個調查甘乃威委員會，都算多風多雨，由於《議事規則》規定，七人調查委員會要有五個出席先夠法定人數，搞到頭兩次會爭啲因法定人數不足而流會。委員會可能想防止流會醜聞發生，未來兩次會議都定喺星期三下午兩點半舉行，博議員橫豎要留守立法會大樓開大會，缺席委員會嘅機會大減。不過，咁做即係變相逼議員喺大會走堂？好唔好，真係見仁見智嘞！