術數師楊子東早前為香港及政府高官批算過虎年運程，今日會再批算立法會議員，當中以屬豬嘅旅遊界謝偉俊（Paul）、屬羊嘅自由黨方剛、屬龍嘅民主黨劉慧卿較為好運，其次好運係民主黨李華明、職工盟李卓人和鄉議局主席劉皇發。
楊師傅話，阿Paul五十歲開始踏入午火大運，以農曆五月及九月最旺，除了三月及十一月夫妻可能有拗撬外，其餘月份都好順利。至於八字從火土格嘅方剛，大運在戌，四月及八月可大振聲威。至於年初二喺車公廟為香港求得中籤嘅發叔，弱勢政府要繼續搵佢老人家幫手，但係要注意健康，不宜太過勞累。
不過，有幾位議員要留意，好似自由黨主席劉健儀要留意吓健康及小人是非；被指求愛不遂而怒炒女助理嘅甘乃威及女友感情穩定嘅民建聯陳克勤，就要留意吓感情問題嘞。當然，有時批算八字都係想趨吉避凶，將影響減至最少，都係嗰句：「信則有，不信則無。」