批發及零售界立法會議員方剛貴為Jessica同Episode兩個大型時裝品牌嘅老闆，衣着向來講究，西裝都鍾意着Armani。不過講到佢最鍾情嘅手錶，竟然係一隻黑膠錶，而非一眾富豪趨之若鶩嘅金勞或者鑽石錶。當然，話晒方剛都係老闆級人馬，呢隻黑膠錶當然唔普通。
方剛戴緊嗰隻錶係出自意大利名牌Bvlgari嘅手筆。Bvlgari係一個過百年嘅老品牌，最早時期其實係以高級寶石起家，後來生意做到風生水起，仲做埋腕錶、手袋、香水，甚至連酒店嘅生意都做埋。
方剛戴緊隻錶就屬於Bvlgari嘅Aluminium系列，顧名思義，錶殼同錶帶扣都係由鋁合金製成，加埋原廠嘅黑色膠錶帶，可謂低調中見非凡。隻錶仲有個特別之處，就係有卅米防水功能，戴住佢潛水都冇有怕，市價兩萬元可謂物有所值。
方剛話，呢隻錶係五、六年前送畀自己嘅禮物，雖然自己有能力買更貴嘅錶，但佢比較鍾意man啲嘅錶，又覺得鑽石錶太誇張、太招搖，所以呢隻錶一直都係佢嘅「飛佛」，戴慣咗就一直都唔捨得換喎。