本文重點
闊別香港三年幾嘅新加坡女歌手孫燕姿，前日起一連兩日嚟香港開演唱會，咁難得，卓妮都有去捧場。不過鍾意孫燕姿嘅仲有好多人，當中包括廠商會立法會代表林大輝，卓妮尋晚喺紅館門口撞到大輝同老婆一齊睇孫燕姿演唱會，大輝話自己鍾意咗孫燕姿好多年，晚晚都要聽過佢嘅歌先瞓得着，孫燕姿嘅名曲《天黑黑》佢差唔多倒轉都識背。
上河南開會冷病咗
有得睇孫燕姿當然開心，不過大輝為咗睇演唱會都付出咗好大代價。尋日香港青年工業家協會搞咗個政改諮詢論壇，請咗政制及內地事務局局長林瑞麟做嘉賓，仲搵埋身兼協會榮譽顧問嘅大輝做客席主持。點知大輝一出聲，大家就覺得有啲唔妥，因為佢把聲忽然好磁性，仲帶少少沙啞，原來大輝話早前上河南開政協會議時帶唔夠衫，最終喺零下四、五度嘅天氣下冷病咗，但返到香港又忽然變咗十八、九度，一冷一熱搞到好耐都未痊愈。為咗晚上抽時間去睇演唱會，大輝做完論壇後又趕返公司開會，不過可以聽到孫燕姿唱歌，辛苦啲都抵啦！
卓妮