中環出更：再做爸爸 黃永光數口差
已育有一個四歲兒子嘅信和置業執行董事黃永光（Daryl），好快又做爸爸喇！事關佢太太Charis再度有喜。Daryl前日出席活動時開心到震，口快快話太太腹中BB已經四個月大，但心水清嘅黃太就馬上糾正話：「係五個月至啱！」
Daryl前晚拖住懷有身孕嘅太太現身拔萃男書院，欣賞男拔家長同學生攜手為反欺凌而創作嘅舞台劇《勇之撼霸》。原來Daryl係男拔舊生，難怪咁捧場，唔知佢嘅四歲囝囝係咪都會準備入讀男拔呢？Daryl笑笑口賣關子話：「總知好支持啦！」Charis再度有喜，知道係仔定女未呢？Daryl就笑而不答，等大家估吓。
名人家長齊撐男拔舞台劇
轉過頭，卓妮見到前財政司司長梁錦松一家，阿松個大仔係男拔生，梗係一家大細去撐場啦。受太太影響，阿松反對勤有功戲無益，放心畀子女玩各種運動，除咗溜冰、游水、單車、羽毛球，仲學埋滑水同跆拳道，唔通佢想培養子女做國家運動員？阿松就話，運動可以鍛煉勇氣同膽識，等子女明白「敢贏」亦要「敢輸」嘅道理喎。
有份喺劇中飾演一名虐兒家長嘅博愛醫院前主席湯修齊，為咗健康着想，兩年內極速減咗四十磅，秘訣係每周跑步、游水再加健身操，飲食就多菜少肉，前晚同兒子湯德安粉墨登場，果然無晒肚腩。
卓妮