形勢劇變 調整戰略

建制派面對五區總辭補選，態度一百八十度轉變，由爭崩頭搶位出戰，變集體杯葛，轉捩點據聞喺一月二十二日，亦即自由黨突然宣布唔派人參選嘅前一日。據悉，建制派一直磨拳擦掌準備落場搶位，即使上月十五日港澳辦同中聯辦出稿高調評論香港嘅「公投」爭議，當時建制派參選取態依然未變，直至二十一日，公民兩黨提出「全民起義」，大大觸動中央政府神經，認為有鼓吹推翻政權嘅意圖。形勢即急轉直下，格局大變。

據了解，主管港澳事務嘅中央港澳工作協調小組喺上月二十二日召開會議，認定公社兩黨係有預謀、有計劃地喺香港推動「公投法」，形同搞港獨，事態嚴重，遂決定強硬對付，調整戰略，傾向要建制派轉為全面杯葛，全力炮轟。翌日，自由黨宣布退出補選戰場，就係收到風聲，衡量過若然無民建聯嘅鐵票，自由黨單打獨鬥，根本毫無勝算，於是贏唔到議席，都要贏姿態，率先宣布唔陪公社兩黨癲，體面地退出補選戰場。

泛民分裂 票數成疑

公社兩黨講過，如果補選投票率高過五成，「五區公投」便算有效。前自由黨主席田北俊日前話，估計五區總辭後，若然建制派杯葛，整體投票率可能只得一成幾。田北俊如果唔係收到風，就梗係識得鐵板神算嘞，事關建制派唔玩補選，目標正正就係要將投票率撳到得番一成咁上下嘅水平。

根據建制派嘅計算，○八年立法會選舉投票率為四成五，依家建制派唔派人選，以泛民同建制派得票嘅六四比，即使公社兩黨喺補選盡取○八年泛民總票數，都係得三成唔夠，更何況泛民依家內部分裂，其他黨派肯定唔會動員助選，加上建制派不斷將補選定性為挑釁中央嘅危險行為，又欠缺對決氣氛，公社兩黨攞唔攞得番○八年兩黨合共取得嘅三十六萬票都成問題，即使攞到，以全港三百三十七萬選民計算，投票率就係一成左右。

到時建制派就可以話選民以不投票來投票，反對香港搞公投，相信公社兩黨都好難撐落去囉。