禮賓府一年開放兩次，雖則唔講得係重門深鎖，生人勿近，不過，一般市民對禮賓府始終所知不多，更遑論喺裏面開燒烤大會。克勤仔喺○六年至○八年任特首辦特別助理，返工第一日就學影印，理應好熟悉禮賓府環境，佢見玩轉禮賓府事件鬧得熱烘烘，於是尋日發揮網民有好嘢齊齊分享嘅精神，喺網誌為大家解構呢座歷代港督同特首（老董除外）嘅大府第同辦公地方。

會議室閒人免進

家務員「肥仔」帶朋友玩轉禮賓府，留低佢哋腳毛嘅地方包括有花園、錦鯉魚池、會客廳、大禮堂、會議室、廚房同廁所，克勤仔講句公道話，指呢班八十後闖進嘅地方，其實大部分喺禮賓府開放時都畀公眾遊覽同拍照，不過，會議室、魚池同廚房就例外，尤其是會議室，更加係外人不得涉足嘅禁區。

洩露今次禮賓府失陷嘅四十二張網上照片中，其中一張相有兩名青春少艾喺一個儲物櫃前留影，一臉風騷，引起網民好奇。克勤仔話，咪睇小呢個櫃，嚴格嚟講，個儲物櫃算係禮賓府防竊聽保安設計嘅一部分，儲物櫃放喺禮賓府地庫嘅會議室外面，司局長每日入去開「早禱會」前，就要「繳械」交出手機，鎖喺櫃內，防止會議嘅機密被人透過手機對外洩露。

克勤仔又喺網誌上透露，禮賓府主樓涵蓋特首同特首辦主任辦公室、會客室同宴會廳，會議室喺地庫；鑑於主樓地方有限，其他職員大多喺分翼辦公，近年甚至將部分家務員嘅宿舍，改裝成辦公室嚟用。克勤仔又透露，特首辦員工出入必須戴工作證，而進入不同區域嘅辦公室時，更要額外使用電子通行證，先至可以通過；下班時就要將辦公室鎖上，特定文件規定鎖喺金屬文件櫃內，以策安全，可惜看似精密嘅保安，竟然都擋唔住家務員同埋佢班「八十後」朋友，真係徒勞無功！