國內同胞鍾意來港shopping，都係貪香港貨真價實，但大名鼎鼎嘅廣州呼吸疾病研究所所長鍾南山即使足不出戶，毋須來港都可以享受購物樂趣。卓妮係講緊鍾所長平日示人嘅筆挺西裝，原來出自本港名人熱捧嘅大成洋服（The Sun Tailor），可能鍾所長忙於研究傳染病毒，「大成」裁縫就親自帶埋布料上廣州幫佢度身，服侍周到。
裁縫親往廣州度身
鍾所長穿着醫生白袍大家就見得多，原來佢揀西裝顏色都鍾意down to earth（樸實）嘅卡其色，衣料方面會選用意大利貨，揀咗較為低調嘅Marzoni，款式方面就同其他名人一樣鍾意較正規嘅設計，無特別要求，好易話為。據講上次裁縫上門為鍾所長度好身後，佢豪爽話要一次過造四套，每套盛惠一萬五千元，四套埋單共六萬元，每件西裝褸內袋均繡有佢「Zhong Nan Shan」普通話拼音名字嘅字樣。
黃英豪愛純羊毛料
大成洋服開業於1989年，三年前由金鐘海富中心搬到中信大廈，老闆郭永賢（Henry）話，該店唔少捧場客都係官商名人，工作忙碌，所以特別提供上門度身做衫服務，好似鍾所長就係其中一位享受呢項服務嘅客人。Henry話，名人客一般好少講價，但該店都會畀番個八折友情價啲熟客，唔知遠在廣州嘅鍾所長，造衫時記唔記得問店舖攞番個折頭呢？
「大成」好多名人擁躉，其中「新金王」金至尊老闆黃英豪、「阿一鮑魚」楊貫一及前警隊一哥李明逵都有捧場。黃英豪幫襯咗大成好多年，仲不時介紹老友去做衫，過去做過十多套西裝，佢話最鍾意穩穩陣陣嘅藍色，布料方面淨係鍾意着意大利純羊毛料嘅Loro Piana及Ermenegildo Zegna。
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |