本文重點
公、社兩黨發動五區總辭，前日正式遞辭職信。有份辭職嘅五個議員尋日最後一次出席立法會大會，不過因為建制派杯葛而流會，搞到佢哋連最後發言嘅機會都無。既然開唔成會，公文袋陳淑莊（Tanya）同袋巾傑都不約而同咁話，應該返入議事廳影番張相，即時就叫助理跟佢哋入議事廳。其實Tanya一開始都喺度諗，佢哋兩個可唔可以就咁大搖大擺行入去影相；不過袋巾傑就話，既然佢哋嘅辭職仲未生效，入去影相都無咩唔妥。
未向秘書處申請
但正當袋巾傑擺好「甫士」等助理幫佢影低「最後一照」時，立法會保安就急急腳走入議事廳，話會議已經完結，如果議員要影相，就要先向秘書處申請得到許可先得，邊個都無情講。食正檸檬嘅袋巾傑惟有面懵懵拉番啲助理走。
除咗亂影相唔理規矩，袋巾傑連聽記者發問都斷章取義。話說記者會時有個自由亞洲電台記者問佢哋點應付建制派嘅杯葛，袋巾傑聽到佢講普通話，即時好開心咁話連中央電視台都關注五區總辭嘅情況，搞到女記者好尷尬咁澄清。睇嚟袋巾傑參加補選時，要回復番正常狀態先至有機會返到入議會嘞！