NBA聽朝將會上演東岸冠軍前哨戰，魔術主場迎戰塞爾特人，其實兩軍喺聖誕節先碰過頭，當時就交出一場低水平賽事，今回少咗聖誕氣氛嘅影響，應可回復水準。魔術一月戰績唔理想，但要留意佢哋今個月實在太多作客比賽先影響成績，今回有主場之利，可以睇高一線。（now 670周五早上9時直播）

魔術踏入二○一○年後表現大跌Watt，本月十四場賽事輸咗八場，經歷今季一個小低潮。不過，魔術低迷主要係不擅作客，球隊本月已經打咗十一場作客比賽，以一支靠主場搵食嘅球隊嚟講，一月跌Watt尚可以接受。

塞爾特人三巨頭跌Watt

話魔術靠主場搵食絕不為過，皆因今季廿場主場贏十六場，客隊想到訪奧蘭多攞甜頭，絕對唔容易。魔術在「聖誕大戰」輸畀塞爾特人，主要因為「魔獸」杜域侯活失準，加上另一主力尼爾遜亦未能發揮領袖角色，先畀「綠衫軍」有機可乘，但吸取上次教訓後，魔術應可回復水準擊敗塞爾特人。

論整體實力，魔術並不在塞爾特人之下，而「綠衫軍」「三巨頭」今季已經有跌Watt迹象，加上加納特又不時受傷患困擾，今回作客出戰，勝算更低。

■本報綜合報道