政情：四眼哥哥 自爆身世

稱移居前生活冇印象

四眼哥哥早前喺網台節目入面透露自己嘅童年往事，聲稱係為咗等公眾認識同了解多啲。喺節目中，佢自爆自己嘅出生背景同梁天琦相近，同樣都係內地出生後唔夠一歲就嚟香港生活。唔單止咁，佢仲透露，話爸爸同埋大部分家人都喺香港出世，唯獨自己就喺家鄉潮州出世。至於箇中原因，四眼哥哥就話冇問過父母，同埋話對一歲前嘅事冇印象，仲好慶幸自己可以一早嚟香港生活添！

令四眼哥哥一炮而「紅」嘅，就係佔領行動期間喺金鐘佔領區「拆大台」，之後仲創立咗社運組織「學生前線」，但組織喺上年已經解散。其實佢早喺遷拆皇后碼頭、反高鐵撥款時已有參與社運，但佢就話當年自己性格比較孤僻，所以當時就算有政黨向佢招手，佢都拒絕。之後佢喺○九年仲去咗澳洲讀書，直到佔領時期先再度參與香港社運。

梁天琦身世被指「非本土」

仲記得喺梁天琦參選期間，四眼哥哥曾經幫佢助選，當時都有街坊認錯兩人。「四眼弟弟」喺選完之後被翻舊帳，質疑佢喺內地出世，仲搵咗佢張長髮舊相，嘲笑佢係「大陸喱」扮本土派。雖然佢最後承認自己並非香港出世，仲強調香港人嘅定義係不論出生、背景，同埋擁護香港嘅文化同價值觀，但依然都備受批評。可能眼見弟弟搞成咁，睇怕哥哥都學精咗，實行自爆早啲洗底，好過遲下尤其喺選舉期間畀人揭發咪仲大鑊。

四眼兄弟唔單止個樣似，就連出生背景都咁似，再加埋佢哋都先後有意參選立法會，依家連政治理念同從政之路都似埋。不過弟弟梁天琦就喺補選中同議席無緣，究竟哥哥鄭錦滿係咪可以殺入立法會抑或會步弟弟後塵呢？咁就要拭目以待喇！