本文重點
行政會議成員查史美倫（Laura）平日衣着端莊，鍾情Salvatore Ferragamo「飛甩雞毛」同Prada等名牌，但原來喺佢眼中只算係好casual。尋日卓妮喺中環一間五星級酒店撞到Laura，佢話現時只擔任公職，衣着唔會太隆重，每日按行程挑選服飾，如果無重要約會就着得casual啲，外套西褲加對平底鞋，但佢卻難忘以前做全職時着高跟鞋嘅日子。
拒評論雷曼事件
Laura喺中港兩地證監會服務咗十幾年，在任香港證監會期間跟過四位主席，喺中環財經界打滾多年，佢話以前好鍾意着高跟鞋喺中環周圍踢，都幾攰吓㗎，但無辦法啦，貪靚嘛！當年着高跟鞋為主，所以Laura十幾年前買落嘅平底鞋得個擺字，到依家終於可重見天日。
曾經與Laura喺證監會共事過嘅高秉忠，前日喺立法會研究雷曼事宜小組作供時，大讚Laura具豐富金融監管經驗，又敢於向政府據理力爭，Laura就話與高好熟落，當年嘅工作關係又好密切，但對雷曼事件就唔評論喎。Laura現為行會成員，仲係港區人大代表，還擔任港交所獨立非執董，幾項公職工作量唔算大，生活好優游！