阿Paul日前喺財委會大戰班拉布議員期間，不斷收到建制派議員紙仔，勸佢封嘴，以免會議愈拖愈長，最後連煲呔曾都透過特首辦主任譚志源，叫佢咪再糾纏落去，不過佢不為所動繼續開火。佢尋日同傳媒會面，就揶揄煲呔曾一方面話會聆聽八十後青年人嘅聲音，另一方面又唔敢親身出去同班斷食青年對話，仲喺警方清場後翌日，先至「賊過興兵」譴責當晚嘅衝突事件，顯示佢無膽兼得把口。

講到自己今日提出嘅停建添馬艦動議，阿Paul就更火滾，踢爆煲呔曾曾經搵人游說佢放棄提出有關動議，或者改過個動議字眼，總之唔想見到「停建添馬艦」呢幾隻字。阿Paul最後當然冇睬佢，但其後專業會議議員何鍾泰就提咗一項修訂，刪咗動議內嘅「停建添馬艦」用詞，唔知係咪煲呔曾搞唔掂阿Paul，要搵何鍾泰出手呢？

白姐姐「黑材料」狙擊毓民

其實呢類動議根本冇法律約束力，即使通過政府亦無需要做，煲呔曾咁都要使橫手阻撓，證明佢真係當咗添馬艦政府總部係佢私人王宮，唔想工程有任何阻滯或延誤，令佢可以喺二○一二年卸任前趕得切搬入去，等佢卸任後都留番啲記憶。

阿Paul又透露，自由黨田北辰約咗佢下周食飯。問田二少係咪想透過佢勸退白姐姐唔好出戰九龍西，佢話不得而知。阿Paul話白姐姐最近差不多日日都去接受電極按摩治療，希望可以變番後生啲，打好嚟緊嘅選戰，用佢嘅話說，白姐姐仲準備咗大量與對手黃毓民有關嘅「黑材料」，相信邊個都勸佢唔到喎。

至於之前誓神劈願跟隨泛民辭職出戰港島區嘅金融服務界詹培忠，阿Paul就話詹Sir向來賭術精湛，但今次似乎都落錯注，估計最後會縮沙唔辭職；阿Paul呢招事先張揚，等各方有心理準備，都幾高招呀！