李三元搞露天派對，東華前主席馬清鏗、孫秉樞、陳聖澤、余嘯天及總理何超蕸等人都有出席，當晚天氣寒冷，大家喺火爐邊聽住Liveband共進晚餐，夠晒溫馨，呢一切構思，原來出自李三元二公子李仲怡（Jamie）嘅心思。

甜品癡李三元擺下甜品陣饗賓客，令人目不暇給。	放大圖片	李三元（左四）臨別秋波請客，多位東華副主席及總理畀面撐場，右五為何超蕸，左三為梁定宇。

Jamie畢業於美國華盛頓大學商學系，依家喺中大讀緊MBA，最擅長搞活動，健談嘅大公子李曠怡（Jason）就穿梭會場招呼賓客，難怪李三元可以印印腳等開飯。卓妮見李三元揀咗件LV淺啡麖皮褸、配上Dolce & Gabbana頸巾及同牌子立立令皮鞋，睇落後生晒。

卸任飛日本瘋狂購物

李三元自認係「購物王」，家中收藏多件名牌皮褸。無計喇，買嘢有助減壓，佢話做東華主席嘅日子馬不停蹄，忙到氣咳，好在總理們上下一心，令佢好感動。東華嚟緊仲有大製作，三月三十日就係東華一百四十歲生日，李三元賀埋壽至落莊，見證歷史一刻，卸任後會飛日本瘋狂購物，獎勵自己。

晚宴上，卓妮撞見何超蕸，佢話賭王爸爸早前出席澳門回歸活動後非常興奮，身體康復神速；至於新年會否回家度歲，要睇醫生點決定喎。

眾人飯敍至夜晚十點幾仍未捨得走，因為主人家悉心安排重量級甜品做壓軸菜式，廿幾款甜品放滿十幾米長餐桌，場面好壯觀，各類甜品琳琅滿目，令人目不暇給，包括香濃朱古力蛋糕、芝士蛋糕、草莓朱古力、精緻曲奇餅、菠蘿批、雪糕及生果拼盤等任食唔嬲，唔少賓客冒住增磅危機，食完一轉又一轉。李三元更加連下幾城，原來佢係「甜品癡」，乜甜品都啱佢！深水灣鄉村俱樂部嘅甜品出名有水準，李三元果然無介紹錯！

卓妮