着新鞋跑到腳痛

曾醫生話，佢呢世人只係跑過兩次馬拉松，第一次係讀中六嗰陣，佢個社長慫恿佢參加，因為不論輸贏都會幫個社攞到分，志在參與，比賽過程都係行下跑下，終於以倒數十名衝線，幫個社攞到寶貴嘅一分。佢嘅第二次，係喺美國讀書嗰陣為咗睇巡遊，先參加嘅十公里馬拉松賽，佢當時特登買咗對新跑鞋去比賽，點知跑完之後對腳痛到飛起，搞到返唔到學請咗兩日假。

佢尋日用自己嘅慘痛經驗提醒其他華仁仔，千祈唔好着新跑鞋跑馬拉松，仲話希望可以同大家一齊跑下個月底嘅渣打馬拉松比賽喎。