今日係馬丁路德金紀念日，係美國嘅法定公眾假期，所以大家會發現好多場賽事都係美國時間打日波，重頭戲係壓軸嘅湖人主場對魔術，高比拜仁真係愈來愈有球味，即使早前背部同手指受傷，但依然帶傷上陣比賽，加上拍檔加素傷愈復出，睇怕魔術都好難喺湖人身上玩到戲法！（廣東體育及中央5台周二早上11時30分直播）

踏入職業生涯高峰

美國好多球評家都認為，今季係高比仔職業生涯以來表現最成熟嘅一季，所講嘅唔係高比仔每場攞幾多分，而係統計數字無法顯示出來嘅獨有氣質，當中包括領袖魅力、爭勝決心同集中力。近期帶傷上陣嘅高比仔，早前話即使仲有一分氣力，依然會落場領軍，成功打動到球迷同一班隊友，湖人喺將士用命之下，近兩場均打出代表作。

當然，湖人嘅回勇亦同加素復出有關，加素早前缺陣嘅六場比賽，湖人輸咗三場，但上仗喺LA打吡戰復出，即大炒快艇四十分，可見加素嘅重要性。

魔術作客連輸兩場

至於魔術雖然有「超人」杜域侯活壓陣，但近期演出麻麻，先後作客輸畀兩支西岸勁旅拓荒者同金塊，杜域侯活兩場波都冇料到，夾埋先攞到十九分，作為球隊嘅得分主力，杜域侯活遇強隊即腳軟嘅表現，實在難助魔術更上一層樓。