卓妮見Vera穿戴簡潔有品味，渾身散發女性魅力，以為佢實喺家族企業幫手，起碼做吓買手或者喺設計擺設方面獻策，點知佢詐嬌話：「我都想啊！但係老公唔畀！」Vera話，原來老公怕佢買返嚟啲嘢賣唔出，又驚對公司職員唔公平，所以唔畀佢插手，兩夫婦各有各做，老公喺先施掌舵，佢自己就出外開Spa店闖天下。

Vera戴住嘅四卡鑽石戒指及鑽石手鏈，係一個印度裔珠寶商為佢度身訂造。	Vera戴四卡鑽石戒指	孫秉樞（中）當年都喺先施打過工，都有現身慶祝酒會，先施第三代馬景華（右）及馬景煊（左）親自接待。

卓妮轉頭問Philip點解咁走寶，佢講笑話：「大家分開發展好啲，萬一我唔掂時要靠佢養嘛！」Philip真係識講笑，先施話晒係百年老店，成立於清朝時期嘅一九○○年，歷經戰亂及政權更迭都屹立不倒。馬氏家族百幾年嚟開枝散葉，依家順利交棒畀第三代，幾代人兢兢業業住祖業，點會唔掂啊！佢錫住老婆就真！

鑽石首飾度身訂造

其實Vera喺設計方面確有天分，當日佢戴住四卡鑽石戒指、手鏈同埋耳環，都係自己畀意見後搵位印度裔珠寶商度身訂造㗎！Vera話佢個珠寶商有好多明星客，間中都會整啲靚嘢拎到佳士得去拍賣，Vera已幫襯佢十幾年添！

講到自己嘅生意，Vera話自己平時幫一間Spa顧問公司做嘢，香港迪士尼樂園酒店內嘅Victorian Spa就係佢開嘅，呢間Spa嘅特色係裝飾復古而且寬敞，令人感覺好浪漫。

酒會當晚香港鐘錶業總會永遠榮譽會董孫秉樞都嚟咗，佢四十年代曾經喺上海先施做過兩年，當時係第二代傳人馬惠林當家，後來佢創業做星辰錶港澳總代理，依家變成先施供應商添！一甲子轉眼間流逝，歲月無情，但他同馬家卻情比金堅。

卓妮