本文重點
憑一杯港式絲襪奶茶勇奪首屆金茶王寶座嘅元朗洪水橋大發餐廳，對上一個周末慘被煲呔曾放飛機；雖然老闆彭氏夫婦一番悉心安排全部被糟蹋，但有麝自然香，依然客似雲來。身兼行政會議成員嘅鄉議局主席劉皇發尋日下午就專程去歎杯奶茶，為老闆打打氣，殊不知「飛機王」煲呔曾快發叔一步，朝早靜靜雞搶閘去幫襯補鑊。
煲呔曾靜靜雞補鑊
卓妮與發叔尋日三點到大發餐廳歎下午茶，發叔唔想有特別優待，事先冇同餐廳打招呼。入到餐廳人頭湧湧，好多茶客見發叔搵位，紛紛高叫：「發叔，呢度有位呀！」江湖地位不言而喻。大家坐落後，笑臉迎人嘅老闆娘彭太隨即與發叔握手，送上兩杯新鮮滾熱辣嘅絲襪奶茶，發叔飲咗啖奶茶後大讚香滑美味，果然名不虛傳，難怪會有咁多人幫襯！
與彭太傾開，先知道原來煲呔曾夫婦啱啱喺早上十一時到奶茶王幫襯，今次煲呔曾兩公婆只帶同一名保鏢靜靜雞到場，再無好似上次咁勞師動眾，亦冇事先打電話去訂枱。老闆娘話，佢哋揀咗個卡位坐低，叫咗兩杯奶茶、一個豬扒包及一個沙爹牛肉包，前後只逗留咗半小時。
不過，經過上次「放飛機」事件，彭太似乎畀煲呔曾鋪牛脾氣嚇怕，唔敢上前打擾，亦冇要求合照留念，更談不上反映民情，只期望煲呔曾兩公婆安安樂樂飲完杯奶茶了咗件心事；相反，彭太見到發叔就自然得多，熱情招呼之餘，仲攞手機同發叔拍照留念添！
卓妮