如果大家熟悉般咸道一帶，相信都會認識開業幾十年嘅莎厘娜餐廳，據講當年不少香港大學學生死慳死抵都要去幫襯吓，其中一個就係高官出身嘅中華廠商聯合會行政總裁梁世華。梁世華憶述，當年讀港大時無乜錢使，所以一儲夠錢就會去莎厘娜開餐，或者與同學輸賭贏咗，要同學賭債「肉」償，唔好心邪，呢種肉正正係梁世華最愛嘅俄羅斯牛肉飯。
梁世華話，俄羅斯牛肉飯質素兩個字講晒：「好食」，又大讚羅宋湯夠正宗，另外一道俄式炒大蝦更色香味俱全。至今梁世華已經幫襯咗莎厘娜幾十年，現時每月起碼會幫襯兩至三次，食到與老闆王殿華相當老友，每次均獲得熱情款待。莎厘娜早前四十五周年紀念期間，梁世華夫婦更約埋港交所主席夏佳理一齊去撐場，認真念舊。
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |