「星之子」陳易希發明極具天分，但原來「煲冬瓜」就未必咁叻。昨日佢出席一個活動，有幸向中國科學院常務副院長白春禮討教內地科技發展，唔知係太緊張，定係對講普通話冇信心，佢全程以廣東話發問，結果要勞煩另一嘉賓北京大學神經科學研究院于常海教授即場翻譯，幸好都無礙兩代發明家嘅交流。
陳易希話，新一年會繼續研究，打算將中四時嘅發明改良，就係一隻監察長者健康狀況嘅手錶，可免長者失救而死。佢現時就讀科大電子及計算機工程系三年級，明年即將畢業，被問到將來去向，佢話：「希望繼續讀上去，但想先出去闖下，可能會搵有關研究嘅工作。」
不過，呢位發明家原來唔單止學研兩忙，仲要抽空拍拖，相當口密嘅佢只肯透露女朋友係喺學系內相識嘅，咁忙可以點樣忙裏偷閒？「惟有當研究係娛樂，秘訣就係『零Hea』，全部時間都要好有效率咁運用。」
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |