名人各有所願

自由黨西貢區議員方國珊（哪吒）尋日同契爺胡楓現身馬場，呢對組合幾新鮮。不過哪吒同胡楓都異口同聲話唔識賭錢，入場只為歎茶。講到新年大計，哪吒期望今年經濟穩定，少啲政治爭拗，又促政府關心一直受忽略嘅中產階層，等佢哋置業安居。除夕夜當晚，哪吒坐船去咗尖沙咀，同旅發局主席田北俊齊齊參加倒數，喺熱鬧聲中迎新年。

合和主席胡應湘同太太胡郭秀萍都入馬場開餐，哥頓話最緊要國泰民安。咁娶新抱呢？佢就咿咿哦哦，笑而不答，公子胡文新仍然係城中鑽石王老五，睇嚟哥頓要加把勁撥大葵扇至得嘞。

醫管局主席胡定旭嘅新年願望離不開老本行：「希望身體健康，少啲醫療事故發生。」馬會主席陳祖澤就祝願天下太平，市民豐衣足食，馬迷贏多啲喎。