好嘞，咁三個單位之中最多人唔妥嘅又係邊個呢？答案講出嚟一樣咁鬼死得意，原來係最有民意基礎嘅立法會議員。民調顯示，市民對於尊貴議員嘅不滿比率高達百分之四十七，較三個月前勁升十三個百分點，不滿程度創咗○五年一月以來新高。

照計，立法會議員好多都係市民直接投票選出嚟嘅，應該好受歡迎至啱o架，點解會有咁多人唔妥佢哋？港大就分析嘞，相信同甘乃威事件以及政改討論有關。

所謂甘乃威事件，即係有人懷疑求愛不遂怒炒女下屬。至於政改討論，即係泛民主派各說各話提出所謂五區總辭變相公投。唔知大家點諗，功夫茶就覺得，泛民鬼打鬼，佗衰立法會！

呢嗱，好似甘乃威呢個涉嫌性騷擾女下屬嘅民主黨議員吖，求愛本來冇問題，不遂先至大大劑，求愛不遂簡直慘過半身不遂；而更加緊要嘅係，如果唔係民主黨有內鬼爆料，邊得嚟咁多家醜外傳？一句講晒，民主黨鬼打鬼。

至於政改討論咯喎，功夫茶到家陣都唔明點解要無無聊聊搞個五區總辭。五條茂里辭職再選，大不了咪又係五條茂里重新當選囉，對爭取二○一二年雙普選有乜幫助？假如一個唔覺意，其中一至兩條茂里落選，咁就捉蟲，全盤輸晒。即係話，呢個方案講得好聽係高風險、低回報，講得難聽係有風險、冇回報，難怪根據另外嘅民意調查顯示，過半數市民反對五區總辭。民主黨蠢唔晒，所以由始至終唔贊成，咁就造成紛紛擾擾嘅泛民內訌。一句講晒，泛民主派鬼打鬼。

唉，最有民意基礎嘅立法會議員竟然係最多人唔妥嘅單位，呢啲係咪叫做所託非人？市民用選票將政治從業員大腳傳中踢入立法會，係希望民選議員監察政府，係希望民意代表仗義執言，唔係叫你監察女下屬嘅花容月貌，亦都唔係叫你執隻香蕉亂咁掟！

接近一半市民不滿立法會議員，滿意度只有少得可憐嘅百分之十八，最高興嘅一定係陰陰嘴偷笑嘅曾蔭權。大家試諗諗，假設煲呔曾失驚無神又推出慳電膽風波續集，民望跌到趴街嘅議員仲有冇牙力批評佢私相授受益親家呢？議員自己都冇乜公信力，監察官商勾結自然軟弱無力。

計功夫茶話齋，前一排意大利總理貝魯斯干尼遇襲，民望即時止跌回升，立法會議員不妨使出苦肉計，自編自導一齣擲物奇案，將自己掟到崩鼻甩牙，或者可以博到同情推高民望啩！