本文重點
瑞士菜喺香港屬冷門之選，呢排天氣咁凍，唔知會唔會令人諗起冰天雪地嘅瑞士？隱藏喺半島酒店內，有間擁有逾四十年歷史嘅傳統瑞士餐廳Chesa。立法會議員葉劉淑儀平日好「錫身」，為保身形，食都要食得有價值，佢特別推薦呢間餐廳，除咗特別欣賞呢度嘅食物，仲係因為一位俊男。
葉太作風一向我行我素，不愛湊名太團食飯，寧願獨自享受鋸扒樂。早前一個周六晚上，葉太揸住架價值百五萬綠色保時捷瀟灑而至。一個人開餐咁靜局？原來係約咗俊男Bernard Chan。呢位Bernard唔係前行會成員陳智思，而係Chesa嘅酒侍兼葉太Facebook朋友。葉太大讚Bernard又英俊又上進，知道佢剛結婚，專登送上電子相架做賀禮，擅長品酒嘅Bernard醒目地倒番杯House Wine紅酒同葉太飲番杯。
葉太呢晚點咗蟹肉奄列配龍蝦汁及蘇黎世牛仔肉配瑞士式薯餅。葉太話，以新鮮蟹肉配奄列，味道出奇地咁夾，加埋龍蝦醬汁更加能帶出海鮮香味；至於另一款蘇黎世牛仔肉，更係出名嫩肉，肉汁豐富。
《米芝蓮》朱古力慕絲做甜品
葉太怕肥，未有來一客著名瑞士火鍋，反而點咗一客連新出爐《米芝蓮指南》都推介嘅朱古力慕絲做甜品，瑞士朱古力以軟滑香濃聞名於世，單睇葉太嗒得咁回味，就知呢餐瑞士菜已俘虜伊人芳心。埋單計數，晚餐盛惠一千蚊左右。對於唔少打工仔嚟講，餐飯一啲都唔平，葉太就話間唔中豪一次，唔介意喎。
葉太用餐時飲咗少許紅酒，最後Call司機嚟車佢走，一定唔會酒後駕駛。
卓妮