呢個世界，有好嘢唔怕認。好似煲呔曾咁，好嘢自然爭住攬上身，講咗十多年的郵輪碼頭終於動工啦！首個巨型郵輪泊位，最快都要二○一三年才可落成。唉，真係天若有情天亦老，人間正道是滄桑！如果郵輪碼頭十年前落成，老朽便毋須撐着拐杖去迎接從福建遠道而來的童年戀人，而是撐一把油紙傘，等你，在雨中！你話幾鬼浪漫——十年是多麼關鍵的一個詞。如今老朽髮已蒼蒼，鬢亦星星，敢問：人生有幾多個十年？
煲呔曾，虧你還臉不紅氣不喘的說：這正是我在二○○七年提出發展十大基建的理念。十大基建一味歎慢板，比起鄰埠的新加坡、上海、三亞都遲了好幾年，深圳政府去年決定在蛇口興建一個集「海陸空鐵」於一體的現代化、高標準國際郵輪母港，三年完成，二○一一年啟用。煲呔曾，你飲香港水大，冇理由唔知乜叫作「執輸行頭，慘過敗家」啩？畀人飲咗頭啖湯，好心你就唔好再往自己臉上貼金啦！
有個笑話：袁世凱曾經不無得意地對外國人說：「張之洞是講學問的，我是不講學問，專門辦事的。」「曠世怪物」辜鴻銘對此嗤之以鼻，說：「除倒馬桶外，我不知道天下有何等事是無學問人可以辦得好的。」
今煲呔曾大可搶着答：「吹水，往自己臉上貼金囉！這要甚麼學問！」答得好，抵你一覺瞓到大天光。別人給三分顏色，自己就開起染房。
煲呔曾，也難怪你六十五歲，望之如四十許。煲呔曾，老朽毋須你請食飯，但願你過兩招如何睡得好，活得年輕，除了去把臉皮拉厚，其他的，老朽都向你學習！