每逢暑假及聖誕節，好多喺外國讀書嘅名人子女都會回港同家人共享天倫，會計界立法會議員陳茂波（Paul）嘅公子陳天行（James），都由英國返香港同家人歡度聖誕節及新年。阿Paul話，原本一家人諗住去泰國玩幾日，但因為囝囝一月頭就要趕返英國考試，為免太頻撲只好留港過聖誕，亦好讓囝囝多啲時間同爺爺敍吓舊。
聖誕節一家大細最好就係去食聖誕大餐，但阿Paul反而唔想同人逼，寧願買啲靚牛扒返屋企開大餐，一家人邊鋸扒邊傾偈開心吓，除咗無拘無束外，荷包都慳番唔少，啱晒阿Paul節儉嘅美德。講到慳家，原來阿Paul嘅囝囝James仲慳家，去年入讀英國牛津大學修讀法律，話咁快一年已過，聽聞個書包已經用到好殘舊，但都唔捨得買新書包。
阿Paul不忍見到James個書包咁殘舊，於是送個斜孭袋書包畀James做聖誕禮物，佢話斜孭款式啱晒時下年輕人喎。James繼承陳家嘅節儉美德，阿Paul就真係安樂晒囉！