工聯會會長棠哥鄭耀棠一手一腳拉攏建制中人組成「政制向前走大聯盟」與泛民抗衡，上星期已經公布咗九十六個發起人，不過名單中全是建制派嘅中堅分子，似乎無乜驚喜。棠哥尋日再公布第二批名單，四十八人中大部分係港區人大、政協，惟今次拖埋身兼政協常委嘅新地非執行董事郭炳湘與樂壇校長譚詠麟，都有啲睇頭！
上一份名單其實都有藝人萬梓良，只係佢近年幾近息影，外界質疑棠哥牙力唔夠，請唔到有分量又有噱頭嘅人物加入，加上大聯盟近日被指廣告誤用區徽，認真係出師不利，棠哥可能受到呢啲批評嘅啟發，先諗到要搵譚校長出手相助。譚校長其實一向與建制中人都幾啱嘴形，今次棠哥吹雞撐政改方案，譚校長都被拖埋落水。
棠哥話，截至尋日傍晚為止，大聯盟再收到四十一個團體和四十八位社會人士加盟，但睇番份名單，依然係人大、政協佔大多數，包括人大代表蔡素玉和盧瑞安，政協委員就有陳婉嫻、張學明、林淑儀、劉宇新等。