今個聖誕節，扮嘢文要去布吉過，因為嗰邊有新酒店開張，向來鍾意陽光與海灘嘅扮嘢文順便去放個靚假，不過玩還玩，出發前，扮嘢文都要「返屋企」巡視吓，咁啱就畀卓妮撞到，扮嘢文話佢一個星期都返去幾日，撞到佢一啲都唔出奇，不過講係咁講啫，撞到扮嘢文點都算係遊園驚喜之一，所以除咗卓妮之外，其他遊客見到佢都好興奮，仲要同佢影相留念添。

想繼續做主席

扮嘢文喺香港落地生根，對香港有感情係人都知，不過佢對海洋公園仲有感情，雖然海洋公園嘅主席只可以做六年，但政府見佢做得有聲有色，特別延長委任，等佢做多三年。扮嘢文話，佢鍾意開心嘅嘢，鍾意見到人開心，所以好鍾意做呢個位，仲好想繼續做落去添。嚟緊海洋公園會開多三間酒店，每間都有自己嘅特色，其中一間仲係以SPA做主題，到時就有更多嘢玩！

講開玩，盛智文有一仔一女，佢話當年無帶仔女入過海洋公園玩，依家仔大女大，大家都各有各玩囉。外表同腦袋都好潮嘅扮嘢文，雖然攞咗中國護照、做咗「中國人」，但佢當仔女好似朋友咁，採取開放態度，從來都唔強迫佢哋，佢哋鍾意點就點，事關佢自己都唔鍾意畀人控制住；佢仲好明白，有一個好似佢咁成功嘅爸爸，做佢仔女難免會有壓力，所以唔想啲小朋友喺佢陰影下生活，呢個爸爸果然好開明！

卓妮