功夫茶唔係靠嚇㗎，呢嗱，同香港未來發展息息相關、拖咗Ｎ年都未開得工嘅廣深港高鐵香港段工程又要押後嘞，今年底動工諗都唔使諗，大批等開飯嘅建造業工人惟有繼續望天打卦等運到。

事緣立法會財委會前日審議六百六十九億元高鐵工程撥款申請，部分泛民議員又玩嘢，利用「拉布」戰術，提出啲九唔搭八嘅話題阻撓議事進程，會議足足開咗四粒鐘都無辦法就撥款進行表決，卒之要押後到明年一月八日再拗過。

興建高鐵可以將香港融入全國高速鐵路網絡，避免成為孤島，呢個已經係社會普遍共識；而且有關工程可以創造大量就業職位，即時紓緩失業率，呢點更加係眾所周知嘅事實。依家一拖再拖，唔知幾時先至可以開工，你話呢班政客係咪搞嘢吖。

唔怪得建造業總工會負責人對撥款押後極度失望，批評立法會議員唔應該為反對而反對，令基建發展停滯不前。事實上，依家建造業失業及開工不足情況嚴重，立法會阻礙工程發展，唔止影響工人生計，而且影響整體經濟。計功夫茶話齋，政客「拉布」，香港「拉柴」，累到工人冇飯開，試問點對得住選民！

話時話，一個巴掌拍唔響，如果唔係港府弱勢無能，授人話柄，呢班政客又點會有恃無恐吖。高鐵項目一直是非多多，其中一個最大爭議係成本太貴。點解？咪又係港府議而不決、決而不行種落嘅惡果。高鐵計劃九年前提出嗰陣，預算造價不過係一百七十億，但工程拖拖拉拉未落實，到舊年當局拍板興建，預算已經去到三百九十五億。到咗今年，造價更暴漲至近七百億，成為全球最貴嘅高速鐵路。至於點解興建呢條區區二十六公里長嘅鐵路要使咁多錢，港府一直未能清楚解釋，嗰班議員仲唔狂砌咩！

除咗天價成本惹人質疑之外，港府喺籌備規劃過程諮詢又唔足夠，求其敷衍，對於高鐵經濟效益、總站選址等問題又交代不清，不盡不實，令市民極之不滿，政客有機可乘，梗係搏命抽水啦。

無計啦，呢個政府決策優柔寡斷，做事畏首畏尾，香港回歸咁耐亂足咁耐。睇下人哋澳門，回歸咁耐旺足咁耐。呢次澳門回歸十周年慶典，國家領導人大讚澳門各項建設欣欣向榮，同國家「同發展、共進步」。澳門一日千里，香港原地踏步，港府班高官唔該快快趣趣「查找不足」啦。

唉，香港搞成咁，真係愈睇愈心噏。正經事冇人做，無無謂謂嘅嘢就拗餐飽，香港又點可能唔邊緣化吖。一句講晒，香港遲早唔係畀班無良政客玩死，就係畀無能政府累死。