港版「假保育」就係政府喇。話說一級歷史建築灣仔藍屋被納入第二期活化歷史建築夥伴計劃，地政總署早排決定拆咗屋內超過八十年歷史嘅木樓梯，理由係木板被白蟻嚴重侵蝕，會危及公眾安全喎。

按原先規定，為建築物作活化嘅機構唔能夠改動藍屋顏色、露台同木樓梯等，但當局唔理居民同保育人士反對就郁手，結果拆完至發現，樓梯板一啲白蟻侵蝕痕迹都冇，白蟻無喇喇畀政府砌生豬肉，你話係咪搞笑吖。

有立法會議員形容，「好似話你生癌一定要切咗隻腳，但切咗就同你講原來你無生癌」，咁做令人難以接受，誓要追究部門責任。

講真，藍屋既然係歷史建築，有價值嘅除咗幢樓本身，仲包括地磚、欄杆、樓梯呢啲建築細節，如果得番個殼，又點反映歷史特色？假如任拆唔嬲，不如起幢外形一樣嘅樓，外面髹晒藍色咪掂囉，仲使乜勞師動眾搞活化吖？

當局事後仲死撐，指舊樓梯板有裂縫，承受唔到較高重力。喂，要拆嗰陣就話有白蟻，搵唔到白蟻又話有裂縫，分明係跌落地拿番揸沙啦。如果當初唔係扮有料，先進行諮詢，或者搵滅蟲專家睇吓條樓梯，使乜搞出咁大烏龍？

唉，查實港府假保育早有前科。好似港島司徒拔道景賢里咁，曾經係荷里活巨片《生死戀》同港產著名電視劇《京華春夢》嘅取景地點，好有保留價值，但港府沉香當爛柴，兩年幾前景賢里畀人拆到甩皮甩骨，港府畀市民炳到七彩，迫於輿論壓力至將古老大宅列為暫定古蹟。

仲有吖，美國《時代》雜誌網站選出二十五個遊客不可錯過嘅亞洲體驗，香港佔咗三個，包括去新光戲院睇粵劇、參觀李小龍故居同埋香港電影資料館。不過，因為港府闊佬懶理，新光戲院呢座「粵劇殿堂」一直畀業主迫遷，最新租約只得三年，即係判咗死刑，不過緩期三年執行啫。

一代武打巨星李小龍故居命運亦差唔多，早就變咗做時鐘酒店，保育團體爭取多年，政府先至同意將故居改為李小龍紀念館，但唔知幾時先成事。呢啲咪叫人哋當係寶，港府當係草囉。

當局就算將物業列為歷史建築，跟進措施一樣亂龍，業主賣又唔賣得，拆又唔拆得，物業變相充公，直頭一殼眼淚；但講唔埋政府幾時失驚無神會改變初衷，又話唔係歷史建築，總之就畀班官玩死。

計功夫茶話齋，港府保育歷史建築不過係趕時髦啫，既冇明確目標，又冇長遠規劃，有眼無珠，真假不分，連有冇白蟻都冇本事搞清楚，靠呢班官去保育文物古蹟，蛇都死啦！