接掌CBA上海鯊魚隊嘅姚明，日前在太太葉莉陪伴下返抵上海，尋日「姚老闆」首次攜隊員集體亮相社會公益活動及球會冠名儀式。在美國野生救援協會嘅記者會上，姚明與上海男籃一同護「鯊」，宣言「拒食魚翅」！預計姚明會在上海逗留一個月，並親自督師鯊魚隊在CBA新季賽事。

姚明前日與太太葉莉抵達上海，準備以老闆身份出席母會上海鯊魚隊接二連三嘅活動。「小巨人」對內地媒體透露，現時左腳傷患恢復得不錯，所以火箭亦肯「放人」，允許佢前來上海，但骨裂部分始終需要時間愈合，所以姚明亦重申要下一季才能復出，而今次亦有軍醫隨姚明返滬。

唔慣被叫「姚老闆」

姚明自成為鯊魚隊老闆後，尋日就首度攜隊出席美國野生救援協會所製作嘅護鯊電視廣告全球記者會，向全球人士呼籲要保護鯊魚，○六年已成為「護鯊大使」嘅姚明表示：「鯊魚是人類的朋友，而不是人類的食物，恰好上海男籃的吉祥物就是鯊魚，相信是一種緣分。」估唔到平時木木獨獨嘅「小巨人」，做咗老闆之後都幾識借勢幫球會宣傳喎。

其後姚明亦出席了鯊魚隊獲瑪吉斯輪胎贊助冠名嘅記者會，原來姚明之前做足功課，千挑萬選先決定同瑪吉斯輪胎合作，難怪被傳媒大讚係一位親力親為嘅好老闆。而姚明亦會留在上海一個月，以老闆身份出席新季賽事。不過佢一再表示，自己唔慣被人叫做「姚老闆」。