仲有幾日就係聖誕節，一班高官打崩頭爭放假，一睇尋日嘅憲報公告認真恐怖，最少有六個問責司局長攞假逍遙遊，最識歎嘅係食物及衞生局局長周一嶽，喺全港開始打豬流感針嗰日開始放十五日假，簡直闊佬懶理。唔知係咪太多局長放假，未攞假嘅政制及內地事務局局長林瑞麟（林D9）十五十六，仲未諗掂幾時放假，話要做減啲手頭工作喎！
林D9為乜唔敢放假呢？相信係為咗燙手嘅政改諮詢工作，仲要應付泛民「五區總辭」，隨時要搞補選。林D9最近走訪十八區區議會諮詢政改方案，尋日輪到去東區作諮詢，主席丁毓珠同八名委任議員向佢遞交聯署意見書，支持香港循序漸進邁向民主普選，區議會亦通過支持文件。不過，反對政改嘅社民連曾健成就向林D9送上兩粒白果，寸政府喺政改食白果。
除咗林D9未有假放外，教育局局長孫明揚都好可憐，只係大前日（十六日）放咗一日假，之後就要鎮守香港，廿三日起捱義氣署任政務司司長，直至廿九日為止。其他放假嘅仲有政務司司長唐英年、財政司司長曾俊華、民政事務局局長曾德成、保安局局長李少光、商務及經濟發展局局長劉吳惠蘭等。