本文重點
時尚、品味、藝術、夢想生活於一身嘅超凡特刊LUXE-life（極尚生活），上月誕生後好評如潮，萬眾期待，尋日再度出版由《東方日報》隨報附送，內容繼續精彩絕倫，由豪宅、跑車、遊艇、珠寶、葡萄酒佳餚等每個生活細節上，帶領大家領略非一般極尚生活。今期打頭陣做封面故事係長實集團旗下嘅尖沙咀廣東道HERITAGE「1881」。
為了推廣「LUXE-life」嘅極尚生活品味，《東方日報》尋日繼續派出多名打扮成英國紳士及淑女嘅靚仔靚女，早上八時開始到中環、銅鑼灣及尖沙咀三區派發特刊，結果大收旺場。
卓妮喺中環分別見到全國人大常委范徐麗泰、立法會旅遊界議員謝偉俊（Paul）、大狀余若薇及香港賽馬會大董布魯士，紛紛索閱「LUXE-life」。
介紹新消閒地標「1881」
阿Paul取得「LUXE-life」後急不及待翻開細閱，阿Paul話今期淨係頭版介紹「1881」全新概念文化旅遊及購物消閒新地標，已經開正佢旅遊界嗰瓣，當翻到美酒佳餚版面，阿Paul更被位於四季酒店嘅米芝蓮三星級食肆「Caprice」吸引住，話有機會要去試吓喎。
至於「Caprice」收藏嘅勞斯萊斯級Krug香檳，阿Paul話品嘗過，確係一流！余若薇係眾所周知嘅富貴議員，試過揹住個三十萬嘅Hermes手袋返議會，但佢謙稱無時間歎世界，真係講都冇人信！
今期內容仲有三十年代面世嘅Gucci Diamante Canvas經典系列、Graff鑽石系列、蕭邦Chopard華貴腕錶；樓盤就有上水「St.Andrews Place」、赤柱「富豪海灣」、九龍塘「畢架山峰」及深水灣香島道「Island Grove」，內容精彩又豐富，難怪人人爭看「LUXE-life」！
卓妮