每年一度嘅工展會尋日開幕，煲呔曾循例又去刺激消費，花費咗一千八百幾元，比去年用咗超過一萬元大縮皮，而佢就畀咗個縮骨原因做解釋，話今年唔使刺激經濟喎。煲呔曾可能掛住睇東亞運，將民間疾苦放埋一邊，市場啱啱至傳嚟有製作公司大裁員嘅壞消息，反映經濟只係假復甦，政府唔使再刺激經濟？煲呔曾簡直係自欺欺人。相反，佢嘅手下林鄭月娥就識做得多，喺工展會落力消費三千元，又不斷應市民要求合照，唔止消費指數高過煲呔曾，連人氣指數都贏埋。
貴價攤位避而遠之
煲呔曾愛唔愛民，大家唔知，但係佢愛錫荷包，就為好多人留低深刻印象。○七年工展會，煲呔曾做騷式巡場，最終只用八十五蚊買咗一條民族頸鏈，去年春節逛維園花市，買咗幾盆年花，夾埋亦唔夠七百蚊，上屆工展會正值金融海嘯肆虐之際，煲呔曾用超過一萬元掃貨，以鼓勵市民消費，旋即成為新聞。梗係啦，煲呔曾肯自掏銀包一萬元，掃貨送禮畀慈善機構，仲唔係大新聞！
煲呔曾豪完一次，今年見經濟表面喘定，於是大諗縮數。尋日工展會開幕，佢例牌拖住老婆鮑笑薇到場「進貢」。煲呔曾好識揀，電器舖一類貴價攤位避而遠之，搵咗一間食品雜貨店嚟幫襯，買咗一堆「口立雜」，有椰糖、年糕同米通咁，相當抵食，全部只需五百元，再幫襯埋文具精品店，買咗六十套立體砌圖，盛惠一千三百八十元，全日夾埋唔超過二千元。
竟話唔使催谷經濟
記者問煲呔曾，點解今屆工展會消費大縮皮，煲呔曾直認：「係呀！」跟住解釋：「今年唔使刺激經濟吖嘛！」香港樓市泡沫上升，唔代表經濟強勁，基層從未感覺到經濟復甦喎，煲呔曾呢個解釋，可能連佢嘅屬下都未必呃得到，尋日現場所見，被煲呔曾讚「好打得」嘅發展局局長林鄭月娥，自動自覺盡情消費，推動內需，似乎深明經濟暗湧處處。
娥姐陪煲呔曾進場後，隨即分道揚鑣，爭取時間購物，買一部攪拌機都已經豪使三千元，另外蝦子麵、烏冬同醬油，樣樣執啲，花費總數肯定高過煲呔曾。娥姐事後話，已經多年無去工展會，「嚟得工展會無理由唔買嘢㗎！」娥姐呢句真心話，煲呔曾唔該聽聽！