現今企業做生意講回報外，仲要講環保同藝術，省靚企業個形象和招牌。藝術中心包氏畫廊舉辦咗個「Art in Use：Sculptural Objects」雕塑展，除咗多國藝術家參展外，恒基地產副主席李家誠統領嘅美麗華酒店亦製作咗一個朱古力花瓶雕塑參展，家誠嘅太太徐子淇前日就出席雕塑展開幕禮，大讚美麗華個雕塑睇得又食得，幫老公省靚個招牌！
今次參展嘅藝術家，將日常用品轉化為出人意表和具活力嘅雕塑藝術，其中美麗華酒店就派出甜品部主廚Thomas Lui，用三日時間以朱古力製作一個名為「Chocolate Sculpture」嘅立體花瓶雕塑，能透視花瓶內部嘅山林及亭台樓閣，子淇十分讚賞，佢說：「呢個作品係將食物同藝術結合，除咗可以食落肚之外，仲可以畀人觀賞。之前酒店同英國劍橋（大學）合作，用白朱古力做咗劍橋一間博物館。」
心：醉心朱古力雕塑
一身Causal Look、戴上鑽石耳環及戒指嘅子淇，尋日幫老公省靚美麗華個招牌外，仲用三千元買了一個鳥籠藝術作品做善事。子淇話自小喜歡藝術，大學時有意修讀藝術，但家人認為應選讀實用科目，所以只好把跳舞、繪畫等興趣當作課外活動。由於現時生活忙碌，子淇已沒有學繪畫，但最近有意學習陶瓷，希望屋企用晒自己做出來嘅碗碟，但要等囡囡出年三歲先至一齊學，一來培養母女感情，二來又可以令囡囡接觸多啲藝術。
子淇因為順應父母要求在大學選讀實用科目，所以佢唔希望囡囡行番自己條舊路，如果囡囡將來對藝術有興趣，佢會加以鼓勵，而現階段會先讓囡囡學吓芭蕾舞、繪畫及音樂，藉此發掘囡囡嘅興趣，佢話暫時發現囡囡嘅音樂感都幾好。聖誕節將至，子淇會與家誠帶同兩名千金到歐美過一個白色聖誕和除夕，但起行之前會先同老爺李兆基去一個短途旅行，佢對長輩真係有心，怪不得四叔咁錫佢啦！
卓妮