政情：2010商界十大頭條人物

《華爾街日報》話，李超人上榜，因為喺國際商場上，今年買下英國三間能源巨企，成為英國能源基建嘅最大擁有者之一，而喺香港，李超人嘅「香港仁‧愛香港」公益行動亦開始好活躍咁做善事，受人關注。

四叔有喜又有愁

另外仲有三位地產商上榜，恒地主席李兆基上榜嘅原因，係旗下天匯撻訂事件遭警方調查，被立法會議員質疑。另外四叔大仔李家傑早前搵代母生咗三個金叵羅，四叔抱男孫，唔少市民都睇過佢張笑到見牙唔見眼嘅抱孫相，都成為頭條新聞。

新世界發展董事總經理鄭家純抨擊政府嘅打擊樓市措施，指會令樓市大跌，另外，新世界百貨年初宣布會喺內地開六間分店，令身為集團總舵手嘅鄭裕彤進身「十大」。「賭王」何鴻燊上年病倒入院，身體狀況一直受到外界關注，早前出席禮賓府嘅大紫荊勳章頒授儀式，近日又高價購入白松露，可謂喜事重重。

李澤楷因有傳警方今年農曆新年前，曾因其喺電盈私有化投票中捲入懷疑種票風波，到其三個住處進行搜證，同埋購入AIG嘅投資公司，進軍財富管理業務，都轟動一時。

滙豐控股今年經歷高層人事變動，所以亦有兩人上榜。前主席加盟英國政府，依家仲係行政總裁嘅紀勤接班落空，其後決定黯然離職，震動商界。而接替紀勤成為滙控候任行政總裁嘅歐智華，公開警告若英國政府執意要將滙控嘅私人銀行服務從投資銀行服務中分拆，就唔排除會將總部遷走，亦都成為新聞人物。

港交所今年亦有兩人登榜，一個係主席夏佳理，受惠於股市向好，港交所今年亦推出不少改革，如公布明年延長交易時段等，成為新聞人物，而行政總裁李小加係首位內地出生的港交所行政總裁，上任後引入好多人民幣業務。

無綫嘅邵逸夫今年亦上榜，皆因有傳佢會將無綫電視賣畀李家傑，都係一時嘅頭條。