東亞運尋日終於揭開序幕，醫管局主席胡定旭同醫管局嘅醫生護士都忙埋一份，事關醫管局有六十五名醫生同六十五名護士用私人時間做義工，自發到各比賽場地駐守，為運動員提供即時緊急服務。大家都知醫護人員工作繁重，但佢哋寧願瞓少陣都過嚟幫手，認真唔話得，難怪肥胡尋日一早就走訪咗多個比賽場地幫手足們打打氣，佢仲承諾等東亞運落幕之後，科水請班手足食餐勁作為慰勞。
咁啱得咁蹺，肥胡原來腳頭都幾好，話說佢尋日第一站去醉酒灣，就見證咗本港ＢＭＸ好手王史提芬攞東亞兼香港第一金，之後佢去紅館，當時正值日本對澳門嘅排球賽，但港澳一家親嘛，原本落後嘅澳門最後反勝日本。睇完排球佢就過番海去大球場睇七人欖球賽，唔使講梗係又係港隊贏啦！不過旺攞金就夠啦，肥胡希望佢哋嘅救傷站全部拍烏蠅，希望個個手足都無工開，咁就皆大歡喜啦！