你知啦，特區政府好鬼死得意，大型工程一係拖拖拉拉，一係推倒重來，難得今次高鐵撥款申請順利通過，簡直係十年未逢一閏嘅天文異象。尋日喎，雖然有大批市民包圍抗議，立法會工務小組二十二名出席議員之中，依然以十二張贊成票，壓倒八張反對票同埋一張棄權票，幾叻仔呀！

咦咦咦，咪住先，工務小組通過咋喎，仲要等立法會財委會審批先至可以落實，會唔會有變卦㗎？家陣咁多人遊行示威反對高鐵，會唔會最終又係胎死腹中㗎？不如咁講啦，如果政府死性不改，硬係黑箱作業，始終唔清楚交代成個決策過程，以及大拿拿六百幾接近七百億公帑係點樣運用嘅，功夫茶應承大家，聽清楚嘞：功——夫——茶——都——反——對！

冇錯，香港需要高鐵，否則落後大勢，內地省市遲早將缺乏高速交通網絡嘅香港邊緣化。問題係，選址點解一定要係西九龍？造價點解一定要係破紀錄？

先講造價吖，政府喺○八年初公布嘅高鐵經費只不過係三百九十五億，事隔年多兩年之嘛，居然一升就升到六百幾億，中間到底出咗乜嘢問題呢？你千祈唔好話畀功夫茶聽，因為官商勾結囉，因為唔知邊個又要明益親家囉，所以造價就變得咁貴嘞。

唔好唔記得，民間團體公共專業聯盟建議過另一方案，可以節省三百億咁多，成日話鼓勵公眾參與嘅特區政府點解唔接納呢？如果話民間團體嘅建議天馬行空不切實際，成日話以民意為依歸嘅港產官僚又點解唔詳細解釋呢？莫講話功夫茶呢啲小市民未聽過官員點樣反駁民間智慧吖，據聞連負責拍板嘅立法會議員都未聽過全盤解說，你話嘞，官樣文章嘅所謂諮詢係咪廢㗎？

好嘞，至於選址咯喎，人哋民間團體建議高鐵總站設於元朗錦上路，一來大量節省成本，二來唔使清拆石崗菜園村，點知政府聽都唔聽，一意孤行堅決選址西九龍。大家知唔知菜園村清拆嚟做乜㗎？因為一旦喺西九龍設站，高鐵就要全線採用密封隧道，而隧道一有意外就好大鑊，所以為咗安全起見，必須中途設置露天救援站；而救援站嘅位置，正正就係菜園村，結果就出現史無前例嘅收地賠償。另外，西九龍總站空間太細，唔夠地方畀列車停落嚟掃地抹櫈洗白白，所以就會出現一個怪現象，列車到咗總站落客之後，必須空車折返駛十六公里去石崗清洗，然後再一次空車返去總站接客。一來一回三十二公里，費時失事嘥能源。

即係咁，唔係反對你興建高鐵，而且熱烈歡迎添，功夫茶只係反對黑箱作業，同埋造價貴得離譜之餘又冇合理解釋。喂，曾蔭權慳電膽風波已經係慘痛教訓啦，你唔講清講楚，人哋話你一句瓜田李下，你水洗都唔清！