專業會議立法會議員石禮謙本周一突然「心痛」，要即時入院進行通波仔手術，大舊石今次手術非常成功，呢兩日仲收到好多親朋好友致電慰問。不過對有報道指大舊石審批高鐵涉利益衝突，搞到依家「唔襟激」嘅大舊石好激心。
立法會工務小組一連兩日表決約六百七十億元嘅高鐵工程撥款申請，有報章前日大字標題話大舊石身為港鐵同有份競投高鐵工程合約嘅新創建集團獨立非執行董事，去年袍金連薪酬加埋有成二百幾萬元，惹來利益衝突疑雲。
大舊石尋日臥病在床都要回應，佢直斥：「有人歪曲事實，誤導讀者。」大舊石話一個月嘅袍金只有兩萬幾，但報道就將新創建畀非執董嘅認股證金額計埋落去，但問題係新創建畀幾多認股權佢都好，大舊石強調自己一元都冇認購過。佢仲話，當時嘅認股價約十六個二，但新創建尋日以十五蚊收市；如果有認購都蝕梗錢喎，當然，呢啲年報就無寫出嚟啦！