外號「青樓名妓」嘅張永霖傳辭任亞視主席，政商界同表驚訝，本身係亞視非執行董事嘅陳永棋，尋日喺一個政協委員沙龍展露面，吸引大批記者到場，但棋哥把口撬極唔開，反而同場嘅廣東社團總會主席王國強，透露一個星期前張永霖出席飯局，並無異樣，仲同大家講亞姐質素添。
飯局由全國政協委員張華峰請客，座上客除咗王國強同張永霖，棋哥都在場。王國強憶述，當晚張永霖同棋哥笑談甚歡，一啲都唔似有大事發生，席間張華峰仲大讚亞姐靚咗、質素高咗，而張永霖就客客氣氣畀反應，話：「係呀？係呀！幾好㗎。」諗唔到事隔一個星期，尋日竟然傳出張永霖遞信炒亞視魷魚，王國強都話感到好突然。暴風雨前夕，原來真係特別寂靜，可以毫無異樣㗎！
「霍老」霍英東兒子霍震宇就重返廣東社團總會，以副主席身份亮相。王國強話，幾個月前重遇霍震宇，叫佢歸隊，霍震宇好爽快話：「你做咗主席呀，好！」咁就畀王國強再踢入會。