近年過咗大海（澳門）搵食嘅前港交所行政總裁「神童」鄺其志，上兩個星期六（廿一日）低調地娶新抱，佢囝囝鄺之彥與未婚妻孫凱寧拉埋天窗，在香港會擺喜酒，神童志出動埋自己部私伙平治豪華房車「KC1300」做花車，「ＫＣ」正是「其志」英文縮寫。神童志兩公婆相當高興，問神童志想唔想三年抱兩？飲到High咗嘅神童志就笑笑口咁話：「有邊個唔想吖，但邊到我哋話事吖！」
神童志娶新抱，各方好友都有畀面出席婚宴，包括賭王何鴻燊四太梁安琪、亞視主席張永霖、ＴＶＢ董事總經理方逸華、骨科名醫高永文、「媽打」李麗娟等，據聞神童志嘅老闆周錦輝都有赴宴。神童志新抱孫凱寧修讀法律，仲係靚女一名，難怪每個出席婚禮嘅賓客都讚不絕口。媽打祝願一對新人白頭到老，永結同心，最緊要係早生貴子，四太就話生兒育女嘅事，後生會識諗，反而最緊要係夫妻恩愛喎。