泛民為總辭動干戈，愈演愈烈，社民連同公民黨唱雙簧，叫民主黨盡快扑錘係咪參與總辭，一派君臨城下姿態，逼民主黨開城門投降，若然民主黨誓死頑抗，泛民內訌勢必加劇。另一邊廂，建制派亦為補選卡位，暗中展開較勁。

五區總辭，即係五區補選，對政府嚟講，等如勞民傷財，但於政黨而言，就係打造新星或一舉翻身嘅千載良機。自由黨內部認為，總辭一旦成事，而親中陣營又決定迎戰，論實力同知名度，去年喺新東同九西落敗嘅田大少同二少，都應該係陣營內嘅首選代表，田少再戰新東，二少轉戰新西接收周梁淑怡嘅地盤，順理成章，該黨希望借補選一役重振聲威。

金勞詹惡鬥田二少？

不過，補選名額最多得五個，建制派撞區機會高，選區誰屬，要拗過手瓜至知。揚言會陪泛民辭職、參選港島嘅「金勞詹」詹培忠，尋日話聽聞民記「蔡菜子」蔡素玉有意再戰港島，佢或會轉戰新西，咁咪變成同二少火星撞地球？仲有，新論壇龐愛蘭亦盛傳蠢蠢欲動選新東，如傳聞屬實，就會同田少狹路相逢。我哋問蔡菜子，佢話一定唔會選。不過到時有咩變數就唔知嘞！

九龍東形勢較明朗，陣營內最有實力係「嫻姐」陳婉嫻，但九西局面就相對混亂，民記想借補選催谷油尖旺區議會主席鍾港武聲勢，但變數不少；如果二少轉區新西不成，退守九西，咁又點算先？睇嚟親中陣營若然真係派人出戰總辭補選，未同泛民對撼，內部已經先嚟一場大混戰！