中環出更：郭炳湘唐錦馨齊歎越菜
新鴻基地產前主席郭炳湘同紅顏知己唐錦馨（Ida）嘅關係雖然已經係公開嘅秘密，但傳媒要影到佢哋合照，難過中三重彩。哈哈，喺啱啱過去嘅星期日晚上八點幾，卓妮喺新地旗下尖東帝苑酒店，就真係咁好彩撞正呢對城中來頭最勁嘅緋聞男女公開現身。佢哋同一位男友人一齊去酒店三樓越南餐廳Le Soleil食晚飯，席間郭炳湘同拍住坐嘅Ida傾談唔多，兩人關係盡在不言中。
聖誕佳節又到，呢個時候最啱同至愛好友溫溫馨馨咁度過。卓妮當晚同朋友去帝苑Le Soleil食飯，喺八點幾九點，突然間見到酒店經理、侍應等一陣忙亂，眾人好恭敬咁迎接突然現身嘅郭家大少，平時行蹤低調嘅Ida赫然跟隨在後。當時好多食客都被呢陣騷動驚擾，正在歎美食嘅卓妮都唔例外。
大方拍住坐
當晚天氣有些少寒意，Ida着咗件深色毛領褸襯埋頸巾，佢一入座就除低件褸，一頭俏麗短髮加上副眼鏡，顯得好斯文淡定。久未露面嘅郭炳湘就着咗成套西裝，神態輕鬆。佢哋落落大方咁拍住坐，同坐喺對面嘅男性友人隨意傾談，氣氛好自在。
郭炳湘早前接受本報訪問時，曾坦然回應佢同Ida係識咗廿幾年嘅「好朋友」，又讚佢成熟、識避嫌、唔求名利，唔明點解外界揣測佢意圖沾手新地業務，字字句句都好維護呢位紅顏知己。
當晚兩人嘅表現又的確似足親人。Ida對正進行局部裝修嘅酒店感到好奇，經常東張西望，指手畫腳，動作較多，郭炳湘就沉靜少言。星期日嘅晚上，風頭最勁嘅一對緋聞男女就係咁樣靜靜度過。
卓妮